मी नंदीबैलाला विचारलं,
पाऊस पडेल का ?
तर तो म्हणाला,
गुबूगुबू गुबूगुबू...
मग कोरड्याठाक तळ्याकाठी
उड्या मारणाऱ्या बेडकाला मी विचारलं,
पाऊस पडेल का ?
तर तो म्हणाला,
डराव डराव डराव डराव....
तिथूनच वाट काढत काढत
पोहोचलो मग पडीक रानात
नुकतेच बाहेर पडलेल्या
तिथल्या मिरगाच्या किड्यांना विचारलं,
पाऊस पडेल का ?
तर ते नुसतेच वळवळत
दिसेनासे झाले...
दमून भागून निष्पर्ण झाडाखाली बसलो
तेव्हा कानावर पडला चातकाचा आवाज
आतुरतेने मी त्याला विचारलं
पाऊस पडेल का ?
तर काहीच न बोलता
तो देत राहिला आर्त साद...
आभाळाकडे डोळे लावून बसलो तसाच
इतक्यात दिसला नाचणारा मोर
त्याचा फुललेला पिसारा पाहून
मी पुन्हा तोच प्रश्न त्याला केला
पाऊस पडेल का ?
तर तो नाचतच राहिला आपल्याच नादात
थुई थुई थुई थुई
पावसाचा सांगावा देणारे हे सारेच जण
पण, कुणाकडेच कसं नाही उत्तर
पाऊस पडेल का ?
या प्रश्नाचं...
आता मी हतबल होऊन
अंदाज बांधू पाहतो वेधशाळेसारखा...
आणि करत बसतो स्टेटस अपडेट
माझ्या थोबाडपुस्तिकेवर
फीलींग पावसाळा वगैरे वगैरे....!!!!
- दुर्गेश सोनार
No comments:
Post a Comment