( ज्येष्ठ समाजसेवक अण्णा हजारे यांनी लोकपालसाठी पुकारलेल्या आंदोलनाकडे पाहताना का कुणास ठाऊक पण मनात राहून राहून गदिमांच्या 'एक हौस पुरवा महाराज' या लावणीच्या ओळी रुंजी घालत होत्या. अखेर लोकपालबाबतच्या आंदोलनाची ही लावणी आपसूकच आली. गदिमांची क्षमा मागून आजच्या तत्कालिकेत ही लोकपालची लावणी... )
एक हट्ट पुरवा महाराज
करा संमत लोकपाल आज
अहो काहीतरी करून
लोकांकडे बघून
दिल्लीमधे जाऊन
संसदेत बसून
गेंड्यांना धडा तुम्ही शिकवा
चला उठा दाजिबा
दिल्लीला तुम्ही आज...
जरा जरा बघा तरी आमचा लुटला मळा
व्याकुळला कंठ धारदार सुरी कापते गळा
उरी आले दडपण कुटिल घाट आगळा
मनासारिखे इतुके घडवा
लोकपाल संसदेत मढवा
त्याचा डंका चहूकडे बडवा
एवढी अर्जी ऐकावी आज
डोक्यावरी गांधीटोपी साजे लोभस गोमटी
मंचावर पुढ्यात झेंडे घेऊन बसा तुम्ही पाठी
रामलीला सुरू जन हिंडती हक्कांसाठी
सारी खदखद जोमानं निघू द्या
जरा सुखानं भाकर खाऊ द्या
लोकपालात बुडतील बुडू द्या
कुणी म्हणेल म्हणो हट्टीबाज
- दुर्गेश सोनार ( दि. २५ ऑगस्ट २०११ )
