सारे मोकाट सुटले
त्यांना रोखणार कोण ?
सारा अंधार भोवती
दिवा लावणार कोण ?
मायबाप खुर्चीसाठी
सारा नात्यांचा लिलाव
खुर्ची स्वतःची राखून
जो तो करतो उठाव !
जागोजागी, जिथे-तिथे
निदर्शने, आंदोलन
सत्तेसाठी वाटाघाटी
सुरू लांगूलचालन !
सारे मुखवटे असे
नाही चेहरा तो खरा
जुल्मी डोळ्यांतून तरी
कसा पालवेल झरा ?
रक्त गोठले असे की
कसे स्फुरावेत बाहू ?
स्वप्न पुढच्या पिढीला
कसे फुलण्याचे दावू ?
- दुर्गेश सोनार ( दिनांक ४ ऑगस्ट २०११ )
रक्त गोठले असे की
ReplyDeleteकसे स्फुरावेत बाहू ?
स्वप्न पुढच्या पिढीला
कसे फुलण्याचे दावू ?
मस्त सर...