राजघाटावर अण्णांचा धावा
दुसऱ्या क्रांतीचा केला रे दावा
गांधीटोपीचा एल्गार नवा
लोकपाला जो जो रे जो....
संसदेकडे दान मागितले
त्यासाठी किती आर्जव केले
विधेयकाचे सोंग ते झाले
लोकपाला जो जो रे जो...
अण्णांच्या मागे भूषण मोठे
आशेचा नवा किरण भेटे
कुणाकुणाची दुखली पोटे
लोकपाला जो जो रे जो...
चिदम्बतरूची केवढी शोभा
मध्ये बापुडा कपिल उभा
पवन गर्जतो भेदत नभा
लोकपाला जो जो रे जो...
खाकी खादीला आव्हान दिले
ताठ होते ते वाकून गेले
कारागृहाचे कवतिक झाले
लोकपाला जो जो रे जो...
जिथे तिथे आता क्रांतीचे गान
आम आदमी उंचावी मान
निर्जिव शिळेत फुंकला प्राण
लोकपाला जो जो रे जो...
दिव्याचे तेज मेणबत्तीला
पात्याची धार साध्या काठीला
अगाध अशीही रामाची लीला
लोकपाला जो जो रे जो...
- दुर्गेश सोनार ( १९ ऑगस्ट २०११ )
No comments:
Post a Comment